Ecole Ste Bernadette de Kamonyi yahize andi mashuri
mu marushanwa y’umuco ku rwego rw’igihugu
Ishuri rya Sainte Bernadette de Kamonyi ni ryo ryegukanye igikombe cy’amarushanwa y’umuco mu mashuri yo mu Rwanda nyuma yo guhigika andi mu mikino ya nyuma yabereye mu Karere ka Muhanga mu mpera z’icyumweru twasoje.
Ni amarushanwa yo ku rwego rw’igihugu yabereye muri GS St Joseph Kabgayi tariki ya 29 n’iya 30 Werurwe 2025, yari yahuje ibigo by’amashuri byitwaye neza muri ‘ligues’ esheshatu ziri mu gihugu, mu byiciro birimo amashuri abanza n’ayisumbuye.
Yari yitabiriwe n’abayobozi muri Minisiteri y’Uburezi, Minisiteri ya Siporo, Akarere ka Muhanga n’Ishyirahamwe ry’Imikino n’Umuco mu Mashuri (FRSS).
FRSS yari yitabaje abakemurampaka barimo Rumaga wa Nsekanabo na Umutoni Sandra mu busizi, Nyiramajyambere Marie Chantal na Tuyishime Jules Cesar mu mbyino mu gihe Tuyizere Kellia na Imanidufashe Emmanuel bakurikiranye ibijyanye n’imbyino.
Mu cyiciro cy’amashuri abanza, mu mbyino amashuri atatu ya mbere yabaye GS Gacuba II n’amanota 86,6 ikurikirwa na EP Saint André yagize amanota 80,6 naho ES Saint Stanislas igira amanota 78.
Mu ndirimbo, Bright Future Academy yabaye iya mbere n’amanota 94,6 ikurikirwa na GS Munini yagize amanota 91,6 ndetse na EP Espoir yagize amanota 90,6.
Ni mu gihe mu mivugo, ishuri ryahize andi ari EP Espoir yagize amanota 89,6 ikurikirwa na GS Kayanza yagize amanota 86,6 na RCCS yagize amanota 84,6.
Ishuri rya mbere mu cyiciro cy’imivugo ryabaye GS Kanembwe II n’amanota 93,3, rikurikirwa na Petit Séminaire yagize amanota 82,6 mu gihe Rwimiyaga TCC yagize amanota 82,3 ku mwanya wa gatatu.
Ecole Ste Bernadette Kamonyi yahize andi mashuri mu mbyino ifite amanota 90, ikurikirwa na Gashora Girls School n’amanota 88,3 mu gihe Cyungo TCC yagize amanota 87,6.
Mu ndirimbo, Agahozo Shalom Youth Village yabaye iya mbere n’amanota 93, ikurikirwa na ES Gahunga n’amanota 88,3 mu gihe GS Kabare yabaye iya gatatu n’amanota 86,6.(https://igihe.com/umuco/article/ecole-ste-bernadette-de-kamonyi-yahize-andi-mashuri-mu-marushanwa-y-umuco-ku)
